急症室

不幸地, 我此等長期病患者, 如在覆診期以外的時間有什麼病痛, 都有很大機會要光顧急症室, 當然可以光顧外面的私家醫生(傷風感冒還可以), 但倘若是其他較麻煩的病痛, 還是要回到有自己詳細病歷的醫院較好.

昨日又要到這個我最不想到的地方, 唉, 我被分流為"次緊急", 最初燈箱顯示要等一個半小時, 誰知由於天氣突然轉冷, 等待期間見到很多公公婆婆被救護車送到急症室, 所以令到等待的時間更長, 再等, 燈箱顯示要等兩個小時, 又等, 變成兩個半小時, 然後又變成了三個小時, 再加上午飯時間, 又要再等, 一等........就得差不多四個小時.  倘若病人被分流為"非緊急"的話, 便要再比我多等一小時, 亦即是五個小時.  幸好最後不用留院, 但我都一早執拾好住院的用品了, 以防萬一.

我其實不太明白, 倘若被分類為"非緊急", 為何還要在這裏浪費時間呢, 倒不如到外面看私家醫生, 不但可以快些得到治療, 餘下的時間還可以回家到床上好好休息呢, 呆呆的坐在急症室, 呼吸着的都是病人的病菌, 不病才奇怪呢? 難道私家醫生真的貴那麼多嗎? 現在急症室也要收一百元了呢!  除非病人真的那麼想住醫院, 又或是領取綜援吧!

旅程的第六天(塔斯曼尼亞)

早上起床, 竟然下着頗大的雨, 有點擔心.  食過早餐後出發到鮑魚廠, 幸好係室內地方, 好彩好彩.  見到很多鮑魚(領隊說塔省的鮑魚較平, 她自己也會購買很多), 職員亦很快將零售的急凍鮑魚拿出來給我們揀, 領隊第一時間已經將最大隻的全揀掉了, 其實有青邊鮑與黑邊鮑, 而青邊鮑味道較可口, 我兩款也揀了數隻以作比較.  一會兒後, 職員又拿出罐頭鮑魚, 還有急凍三文魚片.  經過一輪掃貨以後, 就去埋單了.  誰知老闆再拿出乾鮑來, 但個子頗細小, 領隊見飾櫃裏有較大隻的, 竟然開口叫老闆賣給她, 二話不說已將櫃內的大乾鮑全掃走了, 實在極度瘋狂.

離開鮑魚廠, 雨還在下, 但我們要去果園摘水果, 又好好彩, 一到埗, 雨停了, 哈哈, 唔使攞住把遮摘士多啤梨, 真開心!  個園主勁好人, 本來明日開始先會摘車厘子, 佢竟然俾我地今日都有得摘, 所以我地有兩種水果, 仲要係我最鐘意個兩種.  從樹上即摘即食的水果簡直係無得頂, 勁甜勁多汁勁好味, 就算係日本的超甜士多啤梨都無得揮! 真係好滿足!

離開果園, 要食晏了, 到了蠔場, 可惜我唔食生蠔, 如果唔係一定好happy, 因為d生蠔好新鮮, 又多又平.  食飽就由職員帶我地去睇佢地如何運作, 仲有得試食tim.

離開蠔場, 到最後一站嘞! 去樹頂漫步, 吊橋掛係半空中, 望到好多超粗樹幹既大樹, 有d已經有百幾年歷史, 好壯觀呀!

這趟澳洲之旅, 本來叫8天團, 實際上有兩天都在搭飛機, 但還是令我很難忘, 當中包含了很多的幸運, 高興與滿足, 實在不容易再遇到另一次這樣的旅程和一班要好的團友.

 

旅程的第五天(塔斯曼尼亞)

今天的行程比較輕鬆, 先到農場, 再到受保護動物園睇動物.

其實每日搭車望到周圍都係農地, 有好多牛好多羊, 真係好想去摸下佢地, 今日終於有機會嘞!  一去到, 就見到兩隻牧羊狗好興奮咁追住我地架車, 農場主人就上車同我地環繞佢個農場一次, 作簡單介紹.  佢話主要有三個收入來源, 第一係農作物(包括合法罌粟), 第二係畜牧, 第三就係做遊客生意(即係我地).  佢整左五間屋專係俾遊客租住體驗下農場生活, 收費其實同租酒店價錢差唔多.  佢個度有條河, 河水好清, 可以就咁飲, 佢仲幫我地載咗一支tim. 

我地好好彩, 佢地一年只得六日剪羊毛, 我地咁啱撞正呢個時間, 所以又有得睇.  睇住隻羊好不情願咁被夾住, 然後就任由宰割, d毛轉眼間就被人剃哂, 如果剃緊既時候佢郁, 就會剃捐d皮膚, 唉, 睇到我好肉赤.  睇完仲有牧羊狗趕羊表演, 兩隻狗真係好勁, d羊又真係好似儍儍地咁, 你會好明白乜野係羊群心理, 因為你睇到d羊好似盲頭烏蠅咁完全唔知自己想點, 好好笑, 總之就"走阿走".  午餐其實都係農場食, 佢地會整牛扒或雞扒, 任君選擇, 但係我發現係塔省呢度總係食雞好味過食牛.  其實個農場主人好識搵生意, 佢整哂website, 又嚟過香港聯絡d旅行社, 真係有生意頭腦.  離開農場就去動物園嘞, 真係有d唔捨得.

去到動物園, 滿心期待都係想睇下塔省獨有既Tasmania Devil.  一入到去, 就即刻睇到樹熊嘞, 佢俾個職員抱住, 唔可以俾其他人抱, 真失望. 但轉頭又有驚喜, 有隻小袋鼠走左出嚟, 於是我俾d糧餵佢, 佢一手抓住我, 然後就食阿食, 好得意. 跟住去睇Wombat, 點知佢瞓到隻死豬咁, 好彩之前睇到野生個d, 如果唔係實會失望呀.  終於睇到Tasmania Devil嘞, 佢地咁啱開餐, 好精神咁追嚟追去, 毫無紀律可言.  不停係度搶肉食, 追下又叫下, 好似睇緊閙劇咁, 真係好好笑又好開心.  最後睇埋"依苗"鳥就走, 佢地好似駝鳥咁, 其實我唔知有乜分別.

回程又去食中餐做晚餐, 本來無乜期望, 但竟然有驚喜, 難得咁好食, 真係好滿足既一日.

 

旅程的第四天(塔斯曼尼亞)

晨咁早起身, 因為要趕住搭飛機去塔斯曼尼亞.  一落機, 就要俾隻生果狗聞下有無帶生果入境(因為佢地好嚴格, 唔俾帶任何生果入境).  各自取回行李後, 又上左架Van仔, 開始行程嘞!

第一站先去芝士廠, 有好多芝士, 仲有好多種味道(Wasabi味, Lavender味, Red Chili味, 咖喱味......), 又有得試食, 不過最後都無買到, 我驚Keep唔到溫度會變壞.

終於有晏食, 我叫左Fish & Chips, 老公就叫牛肉批, 味道ok啦. 食飽就去左鐘乳石洞, 由於我唔係好行得, 而且剛落完雨, 路面濕滑, 比較危險, 所以我同老公無入去, 唯有係洞口影下相, 等其他團友行完再俾相我睇啦, 等左差唔多一粒鐘(其實個度都幾凍, 仲間唔中灑下雨tim)

再搭車去搖籃山個鴨子湖度, 睇住架車沿住山路上完山又落山, 好多樹, 樹又好高, 差唔多到既時候, 司機突然停一停車, 原來路邊有隻野生袋熊(Wombat)係度, 佢眼望望我地架車, 然後擰轉面, 斯斯然咁行入草叢度, 好得意.  車繼續行, 我就勁留意路邊, 今次竟然俾我發現到另一隻Wombat, 佢係水渠邊食緊條好青既草, 佢個食相勁可愛, 可惜影唔切, 司機又開車嘞, 激死!  終於到逹鴨子湖, 望落出面勁凍勁大風, 我即刻著多件衫, 着埋手套同頸巾先落車, 仲帶埋把遮, 因為天陰陰.  嘩, 一落車, 真係勁大風, 吹到企唔穩, 影左幅相即刻開始行, 點知行唔夠十分鐘, d雨就開始嚟, 大風又大雨, 我同老公頂住把遮一路行番架車度, 已經成褲濕哂.  原來頭先唔係落雨, 係落霜, 因為當d雨落左落塊面度先知係霜, 真係凍冰冰!

唉, 成褲濕哂, 勁唔舒服, 但係行程都要繼續. 下一站係Sheffield, 即係Eason拍"我的塵世美"畫左幅畫個度.  真係周圍都係畫, 好多幅牆都有畫, 不過因為我地唔夠時間, 所以無去搵Eason 幅畫, 好彩我地無團友係Eason fans.

終於可以回程食晚飯, 但竟然係西式既中餐, d野勁難食, 但間舖頭好旺, 原來仲係攞奬餐廳, 真係唔明, 可能外國人覺得好好食啦.  我地加錢另叫一碟清炒菜心先叫做好食d咋, 勉強食完終於可以返酒店啦.

旅程的第三天(墨爾本)

今天是自由時間, 由於我的團只得七人, 要去十二門徒石其實不化算, 會頗貴, 但我們當中還是有五人想要到那裏一看, 因為其中兩人以前已經去過. 我們額外多付每人差不多一千圓, 再坐來回共六個小時的車程, 才能看到此等奇石. 

奇石真的很宏偉, 但風也很大, 大得企也企不穩, 而且頗凍, 吹多一會真的會給吹死呢!

還有一件事, 墨爾本有兩樣東西特別多, 你猜是什麼?

答案: 就係蒼蠅(但係廁所無喎, 真奇怪) & 肥婆(係超巨型個種)

晚飯我們還自費到一間意大利餐廳吃飯呢, 真是Yummy!

旅程的第二天(墨爾本)

經過了昨日頗悶的一天, 還擔心着今次的旅程會失望而回, 誰知到了第二天, 行程卻如此精彩.  早上到火車站乘搭蒸氣火車, 食過午飯後再到魚場釣鱒魚, 跟着再乘船出海睇海豹, 再吃龍蝦晚餐, 然後夜觀企鵝回巢, 當晚還給我看到五年一遇的天文現象呢!

從未坐過蒸氣火車, 感覺頗新鮮, 而且沿途風景優美, 又沒有車窗阻擋, 可以將手腳伸出車窗外, 真刺激!

到魚場約鱒魚也很開心, 因為老公跟我也曾經有約魚經驗, 所以不用等職員教導, 便到旁邊自己垂釣, 由於鱒魚極度貪吃, 只需一小粒粟米作餌, 已經能令它上釣, 我釣了兩條, 老公則釣了三條, 真是高興!

我很愛出海, 可以乘船出海, 還可以睇海豹, 簡直是雙重享受. 其實頗大浪, 船搖擺得很, 很易暈船浪, 幸好我無事. 海豹其實很臭, 但也很可愛, 那臭味習慣了其實也不覺得是什麼一回事.

企鵝夜晚回巢很攪笑, 它們上岸後會排成一條隊, 很整齊, 然後從沙灘漫漫行回草叢裏的巢穴. 最可惜是不准攝影!

離開企鵝館, 一望上天空, 就看到了"笑哈哈", 真是很精彩的一天.

 

旅程的第一天(墨爾本)

終於到埗了, 到了墨爾本, 已經是下午兩二時多, 當地比香港要快三個鐘. 立即到了一中餐館吃預先安排了的點心餐.

唔, 有點肥膩, 而且差不多每款點心都是有蝦造成份的, 真攪笑! 較有特色的, 還是那甜品.  只看樣子, 估不到是甚麼來的, 一試之下, 哦! 原來是什果味千層啫喱, 真是一款用心的甜品.

吃飽以後, 就到市內觀光, 由於太晏的關係, 本來要去的維多利亞女皇市場差不多都關門了, 逛了數個景點後, 回酒店休息一會, 再到一賭場餐廳吃自助晚餐, 完成了第一天的行程.

小狗病了

真慘, 小狗昨日從狗酒店回來, 表現本來還頗精神的, 回到家後還不停地跟我們玩着拋波波, 誰知一到十點幾, 突然疴肚起來, 還疴液體的糞便呢, 今早更嘔呢, 而且還沒精打彩, 腳步浮浮呢, 真叫人擔心, 只好帶她到獸醫裏一趟了.

Melbourne + Tasmania 之旅

11月29日, 墨爾本+塔斯曼尼亞之旅正式開始.

開茶會當天, 發現整個團只得7人, 可能由然經濟差了, 所以緃然人少, 也能成團, 感到有點愕然, 但也有點高興, 因為旅程一定會比較順利, 人少好辦事嘛!

一直猶疑著購買多一部較新的相機與否, 因為老公已經有一部LX3, 但我自己也同樣喜愛攝影, 本來打算用較舊的相機, 但新的相機功能實在會較好.  到了出發當天, 導遊突然來電說航機要delay, 多了一點時間, 於是到商場吃午飯後, 再順道到商舖購買心儀的FX38, 價錢比早一個禮拜還要便宜了點呢, 真是高興!

九時多到了機場, 誰知班機又要再度delay, 真慘! 航空公司送了兩張$90圓的coupon給我倆當作補償, 但必須當天使用, 可惜我們已吃了晚餐, 只好到許留山吃甜品了!

等了又等, 差不多半夜兩點, 才正式登機起飛, 呼! 眼瞓死了!

Kewpie 電話繩 (6)

這是最後四個電話繩了!

宵夜

不要說在不同的醫院裏有不同的制度, 就算在相同的醫院裏, 不同的病房也會有不同的安排.  病了這麼久, 也住過了不同的病房, 很記得一個很不同的安排, 這就是宵夜.  住在腸胃科的病房裏, 每逢晚上九時, 就會有護理員推着車仔到每一隔病房, 車上放着的有盒裝奶, 蘋果汁, 麵包和餅乾, 也有些是營養師預先開了給病人的宵夜, 每晚一到了這時間, 我也覺得很開心, 因為感覺好像在派發甜品一樣, 感覺很溫暖.  可惜的是, 後來我發現, 原來不是每一個病房也有這個安排的.

一對小貓貓

這對貓貓真可愛, 本來我只買了黑色那一隻, 回家後, 還是覺得不捨, 最後還是把白色那隻也買下來, 成為一對可愛的黑白貓貓!

難得的幸運

今日check email, 發現收到得奬通知, 原來我又係Openrice 個抽奬度得奬, 今次已經係第二次啦, 真係幸運, 又有戲睇! 好彩星期六無買飛睇, 差d就係apm睇左! 哈哈!

對上個次抽到"愛與狗同行" 今次就抽到"CIA光碟離奇失竊案".  寫食評之餘, 又可以參加抽奬, 真係一舉兩得. 我一定會繼續寫食評的.

Kewpie 電話繩 (5)

這幾款也是姐姐(哥哥)送給我的手信! 其實我自己買的反而不多呢!

插尿喉

已記得不太清楚了, 只記得每次一住伊院, 就立即要插尿喉, 感覺很不好受.  可能因為我病情嚴重, 所以每次住進病院也要給她們插尿喉. 插了尿喉, 便不用上小號了, 因為尿液會自動流到尿袋裏.

但奇怪的是, 當我轉到另一間醫院後, 卻沒有被插尿喉, 只需要按鐘叫護理員取尿盆便可.  可能始終是兩間不同的醫院, 管理的方法也不同罷. 還記得伊院其實並沒有太多健康護理員, 多數的人手全是護士, 所以不會有人手可以經常幫忙拿尿盆, 也因此而要大部份病人插尿喉, 以減少人手的需要罷(這是我的想法)!

但很老實說, 如果真的是這樣的話, 那就實在太不人道了, 為了減少人手的需要而要病人插尿喉, 那豈有道理可言?  因為插住尿喉實在是一件很不舒服的事情.

沖涼

在十年前的伊院裏, 並沒有為行動不便的病人洗澡(不知道現在有沒有). 住在醫院裏, 雖然是冷氣地方, 但病的時候總會流汗, 又或是給些什麼的液體弄髒身體, 就衞生問題而言, 總是有需要洗澡罷!  但我看在眼內的, 並沒有這樣的服務.  鄰床又或是我看得見的病人, 如果沒有親人來探望, 就任由她們躺着, 沒有人會幫她們洗澡, 也沒有人會幫她們抺身, 我住在醫院的時間也不短, 但不曾看見有任何人會替病人洗澡.  如果我要洗澡, 也得靠我媽媽幫忙, 有一段日子, 我實在太瘦削了, 根本連站的氣力也不夠, 所以也是由媽媽幫我洗澡的.

但我轉到另一間醫院, 就會看見健康護理員很有條理地安排每天需要洗澡病人的次序, 就算病人是插着喉管吊着鹽水(當然會詢問護士那病人是否適合洗澡), 她們也能夠很有技巧地幫病人洗髮和洗澡, 因為她們有一張特別的床可以給病人躺着洗澡, 不但能幫病人保持清潔衞生, 也省卻家人要幫滿身喉管的家人洗澡的煩惱. 我也曾經讓她們幫忙洗過澡, 因為當時我滿身喉管, 根本不能自己洗澡, 但我也很愛整潔, 難得有機會可以洗澡, 當然不會拒絕她們的幫忙.

Kewpie 電話繩 (4)

今生有幸有這麼多兄弟姐妹, 所以連他(她)們去日本旅行, 也都會買給我一些Kewpie公仔作手信, 雖然身體很差, 但我還算是頗幸福的了!

Kewpie 電話繩 (3)

記得2004年, 同男友(即依家既老公)去日本玩, 買左少少Kewpie.

左手面的Kewpie, 細細粒, 應該得$5咁高, 但係有好多款, 買唔哂咁多, 係上野度買.

右手面的Kewpie, 就係淺草雷門觀音寺條購物街度買.

護士的不同

在伊院裏住了那麼久, 我卻連一個護士也記不起, 這實在有很大原因的.  她們實在太忙了, 因為病床已經那麼多, 自然地病人也會那麼多, 根本沒有一個護士能夠跟你多說一句話, 所以我連一個護士也記不起.  在另一間醫院裏, 相對地病床沒有那麼密集, 而她們管理的形式是每間病房都會有一個專責的護士, 所以你必然會對某一個護士較熟識.  要知道, 病人住在醫院裏, 除了生理上的治療, 心理上如果感到不舒服也會對病情有一定的影響. 住在醫院裏, 見面最多的就是護士, 她們的每一句說話, 以及她們的態度也會對病人有所影響. 

想起當天我給推進另一間醫院的病房, 已經不停地有幾個護士輪流到來床邊介紹自己, 並且安慰我, 叫我不用擔心, 只是這麼一個行動, 已經令我安心許多了.  這裏的護士, 大部份也顯得很和藹可親, 對病人態度良好, 給病人很好的照顧, 所以我對她們很多護士也印象深刻.

相反地, 在伊院裏, 根本不會有機會跟護士談上半句, 甚至連護士的踪影也看不見, 更枉論會有任何印象了.

但有一種護士我必定會記得, 無論在任何醫院, 任何病房, 總會給我踫到一種護士, 我會給她們一個稱號 -- 暴龍. 通常這種護士剪個冬菇頭, 戴眼鏡, 單眼皮, 聲音高八度, 身材不太高, 她們有着同一樣的性格, 就是對病人呼呼喝喝, 態度極不友善, 很可怕, 但她們對同僚卻是另一種態度, 令人覺得很討厭.  通常我遇到這種護士, 都會黙不作聲, 以免無辜被駡.

環境的不同

真估不到, 原來同是公立醫院, 但竟然可以有這樣大的分別. 在伊院裏, 病床與病床之間相隔的位置, 是可以讓我伸手便能觸及鄰床的病人那麼近.   伊院給我的感覺, 是周圍也很殘舊, 牆也是灰灰的, 周圍黑黑沉沉, 感覺迫迫的, 很不舒服, 雖然有電視, 但從來也不開的, 就算開了, 也是雪花片片, 不看也罷. 

而另一間醫院, 兩床相距可要遠得多兩三倍, 真不敢相信, 竟然可以有這樣大的分別. 可能因為比較新的關係, 燈火通明, 又有太陽光照射到, 空間感較闊, 環境舒適, 心情也好一點.  而且有特定的開關電視時間, 電視運作正常.

Kewpie 電話繩 (2) 贈品

這兩個因為係贈品, 所以好似無咁靚!  不過始終都係Kewpie, 左手面的好像是買筆袋時附送的, 而右手面的則是買QB醬附送的.

一蛋三吃

阿媽真係勁, 同樣都係蛋, 而我地又有唔同食法既愛好, 一餐晏, 阿媽就煮左三種蛋俾我地食, 我就食蕃茄蛋, 阿妹就食葱炒蛋, 阿媽自己就食荷包蛋, 哈哈, 真係唔影低佢都唔得.

Kewpie 電話繩 (1)

輪到電話繩出場了, 右手邊那個是我第一個Kewpie 電話繩, 雖然用到黑黑的, 但還是給留了下來, 因為實在太可愛了. 左手邊的則是我第一批收藏的電話繩, 接下來還有更多呢!

兩間公立醫院的分別

因為這個病, 住院時間也有三個半月了.  在伊院住了差不多兩個幾月, 而在另一間醫院則住了差不多一個月.  感覺非常不同, 也慶幸能轉到這間醫院, 才能保住性命, 否則我相信我已不在人世了. 兩間醫院無論在環境, 人手和服務方面也有很大的分別, 我也會將我記得的逐一記錄下來.

吃藥的日子開始了

雖然可以出院, 但有一樣東西便從此跟着我了, 這就是紅斑狼瘡症.
紅斑狼瘡症是一種至今仍未找到原因的免疫系統病, 身體內會自動製造抗體去攻打體內正常的細胞, 簡單點說, 即是體內會產生抗體自相殘殺, 暫時仍沒有治癒方法, 只有靠食藥來控制病情, 由於必須長期服用, 而所用的藥都會有一定的副作用, 但又不能不吃藥, 因為一旦病發, 隨時都會有生命危險, 又或對內臟有一定的損害.  因此, 我便開始了天天服藥的日子.

赤裸的Kewpie

左面的是比較傳統的 Kewpie 款式, 是爸爸在深水埗的舊舖頭找到的.  中間那兩款則是在日本買的, 而右面的好像是隨化粧袋附送的, 化粧袋已經給丟了, 因為已經爛了.

在香港買的

這些都是數年前在旺角的 "潮流特 x "商場買的, 很久沒去了, 現在應該有更多的款色了.

漸漸康復, 可以出院了

隨着餐單慢慢的改變, 由只能飲清湯到可以吃固體食物, 還記得每天早上高級醫生巡房, 我常常問他"幾時可以飲蘋果汁呀?", 真是把他煩死了, 哈哈. 9月16日, 我終於可以出院了, 離開醫院前上一上磅, 嘩! 真是高興, 神奇地, 我重了很多呢, 有75磅呢! 高級醫生還跟媽媽說, "你當日曾問我你個女會唔會死, 我當日唔敢答你, 因為真係有機會會死". 住在這間病房裏, 只有短短三個星期的時間, 便把我這個半死的病人從鬼門關裏救了出來, 還增多了15磅呢, 真是謝天謝地.

來自日本的手信(2)

這是從北海道和福岡買回來的手信, 左面的都是大頭 Kewpie, 定是喝了大陸奶粉, 哈哈!  右面的那個則跟香港那一套很相似.