搬入新屋都唔夠兩個月, 今朝就已經收到管理處電話, 話有人寫信去投訴我地隻狗好嘈, 成日吠, 又話佢D跑步聲好嘈喎! 真係慘!
我都知呢度D人好易投訴架啦, 始終呢度D人讀書多D, 好容易就會出信去投訴. 雖然我都知我隻狗係鍾意吠, 都已經盡量控制住佢, 但最後都俾人投訴, 唯有花D 錢去請人train 下佢, 睇下有無改善啦.
以前住個度, 都係好多人養狗, 我隻狗吠既情況同個陣差唔多, 但從來無人有投訴, 可能人情味多D卦, 所以都住左三年半, 諗住搬大D, 又已經搬到叫做養得狗既屋苑(但如有兩戶人投訴的話都係唔俾養), 點知話咁快就有人出哂信, 其實都知道係樓下單位投訴, 因為佢話隻狗跑步嘈, 咁都係得佢地會聽到姐.
唉, 真係麻鬼煩, 其實阿狗都唔係成日吠, 又唔係一日到黑都係度跑步, 最多都係玩拋波波先跑下姐, 咁都唔得? 我覺得隔離屋D 細路仔仲嘈啦, 成日叫又成日喊, 咁我可唔可以投訴佢地呀? 仲有呀, 隔離屋有兩個單住係同一個業主, 佢個工人成日係兩間屋出出入入, 密碼鎖又成日響, 閂門又"嘭嘭"聲, 唔通我又去投訴佢呀? 樓上個單位, 成日半夜一點先沖涼, 我係度瞓覺都聽到佢D水聲同埋沖廁聲呀, 仲要有個女人無端端係度大叫, 都唔知係咪有精神病架. 如果我好似樓下咁投訴, 家家戶戶都要俾我投訴呀!
