Kewpie-7-11

7-11之前開始換購既Kewpie系列, 我暫時已經得到咗兩個, 真係多得我既家姐細妹.  基本上我無乜機會會去7-11買野, 因為我附近全部都係OK便利店, 所以我對得到呢套Kewpie既期望幾乎係零.  家姐之前仲換埋個袋俾我添, 真係好, 多謝家姐!

好幸運, 居然抽到特別版, 真真高興.

Kewpie - 北海道之旅的戰利品

日本有好多Kewpie既產品, 仲要係每個地方都有佢獨有既產品, 所以呢, 今次去北海道, 我都搵一D我覺得可愛而又未有既款色(實在有太多太多Kewpie既產品, 根本無可能全部買哂).

我已經盡量忍手, 但最後都買左14個Kewpie.

上面呢三個, 本來只想買一個, 但最後都忍唔到手, 因為佢地實在太可愛. 其實有個再大Size的, 但價錢係買一隻大等如買三隻細, 所以我都係選擇買三隻好過. 

左一係美瑛買既海膽, 勁可愛.  左二係登別地獄谷的赤鬼. 左三係旭山動物園買既企鵝, 最後個隻係層雲峽既便利店度睇到, 所以呢, 真係周圍都會有Kewpie既踪影架, 稍一不留神就會miss左.

係札幌既ESTA十數個拉麵共和國度有間精品店有好多Kewpie, 而我當然又忍唔到手, 買左大頭海藻Kewpie, 花花頭Kewpie, 海膽Kewpie.

呢三個索繩袋超可愛, 入面仲有包糖架.

呢個係扭蛋扭返嚟既Kewpie印, 係舖頭門口度搵到.

台北之旅第一天

年幾前, 我仲可以去旅行, 依家諗下就得!

上年台北三日兩夜之旅

第一日(2009年5月23日)

我地搭早機(9:10am), 因為落雨遲左起飛, 最後都要十一點幾先飛到台北. 一落機, 行完條打橫電梯, 見到一條龍, 係排隊既人龍, 原來係"唱"錢.  其實聽人講再行出D都仲有兩間找換店, 所以無加入人龍. 行到第二間, 見無人排隊就換錢(HK$1 對 NT$4.076), 滙率麻麻地, 不過第三間找換店都係一樣.

"唱"完錢就去攪落地簽證, 填完張表格, 加埋NT$200, 連埋身份證俾櫃位, 好快就攪掂, 跟住過海關, 然後就攞行李出閘. 出閘後去旅遊局攞埋地圖就出去搭的士. 

唔使一個鐘, 大約40分鐘, 就到咗落腳既台北車站對面既凱撒大飯店. 住頂樓, 風景好. 最差係個電視係側面, 唔係對正張床, 打側坐係床睇電視勁辛苦.

十二點幾, 出去食lunch, 行咗過對面座統一元氣館, 揀左間類似香港世貿間"吉列專門店"既舖頭, 望落個menu都幾吸引, 叫左個咖喱豬扒飯套餐同咖喱海鮮飯套餐. 先嚟個前菜, 唔知乜野嚟, 一咬落去, 都係唔知乜野嚟, 類似炸粉糰既物體, 唔難食亦唔特別好食, 咬左兩啖, 放埋一邊, 留肚食豬扒好過.  等左十幾分鐘, 嘩, 真係好精彩, 兩盤食物大大盤, 樣子很吸引, 互相交換過後, 先食豬扒, , 味道不太好, 隱約有少許臭豬味, 炸槳雖然做得很好, 但給臭豬拖垮了. 勉強吃了兩嚿, 便放棄了.  幸好那海鮮還不錯, 有炸魚和炸蝦, 總算有餐飯食.  套餐有甜品和飲品. 最後還是吃不下整個餐, 實在太多飯了.

離開餐廳, 到商場走走, 舖頭不太多, 很凋零的感覺, 正如書本介紹的, 有高達, 有無印, 對我來說沒甚吸引, 草草行了再到地下, 因為老公想看電腦.  到了地下, 才比較像樣, 起碼沒有凋零的感覺, 但有電腦商場的感覺.

離開統一元氣館, 看見Starbucks 大排長龍, 原來飲品有買一送一的優惠, 怪不得啦. 我倆沒有加入, 走到隔鄰的新光三越地庫的超市搜羅小食, 卻沒甚收穫, 只買了一包辣的童星點心麵和一支紅茶. 由於腳痛的關係, 便打算回酒店休息. 沿途回酒店, 有人正派發粟米片的試食庄, 她給了我們兩包.  經過台北故事館門口, 影了相便回酒店了.

休息了整個下午, 雙腳腳趾不停抽筋, 我則在不停慘叫, 老公已不停幫我按摩, 但也不甚奏效, 最後出動了 "紫花油", 終於收服了雙腳, 好彩好彩!

到左夜晚, 又要出外搵食, 落左去地下商店街, 真係四通八達, 少D記性都會行錯路. 不過老實講, 真係無乜野行, 求其行左一陣, 就入左間二董牛肉麵. 叫左一碗紅燒牛肉麵同一碗紅燒牛腩麵, 味道還不錯, 只是牛肉切得太大嚿, 比較難嚼, 牛腩切得較薄, 所以覺得比較好味. 飲品免費, 有茶及水, 自斟自飲.

之後行返上地面, 行埋光南大批發, 確實係一個買文具既好地方, 掃完一輪貨, 再去埋便利店逛下有乜野小食, 最後買左兩條朱古力試下, 一條係有爆炸糖既朱古力, 另一條係有朱古力醬係中間既朱古力條. 跟住就行返酒店休息了. 這樣就完成了一天的旅程.

我返嚟啦

今次北海道之旅, 真係令我樂而忘返. 8日時間, 唔長唔短, 但第一次有個種唔想返香港既感覺. 本來想去睇紅葉, 但可惜唔係有太多, 可能仲未到深秋卦, 所以只係睇到小小. 不過唔緊要啦, 有好野食都已經好開心了.  等我有心機既時候最將成個旅程打返出嚟先.

今次既行程就係咁:

第一天: 札幌

第二天: 札幌

第三天: 小樽

第四天: 旭川

第五天: 層雲峽

第六天: 美瑛

第七天: 富良野, 夕張, 登別

第八天: 南千歲

行程本來以為安排得頗輕鬆, 點知都仲係太緊湊, 有d地方去唔哂, 唔係太夠時間.  不過唔緊要, 因為可以有籍口諗定下一次北海道既旅程, 相信應該會更加精彩. 而事實上, 仲有好多地方都仲未去玩, 例如函館, 洞爺, 釧路, 網走.........

實在太多, 數唔哂呀. 總之就好好玩, 好好食啦.