好無奈

星期一返醫院覆診, 做完基本檢查(量血壓, 磅重, 驗小便), 好難得, 好快就叫我個名, 仲要睇一號房(即係見高級醫生), 我心諗做乜唔係睇我睇開o個個醫生(我其實長期睇開同一個醫生), 一入到去, 個醫生即刻同我講 "我知你睇開阿邊個, 不過佢走左去第二間醫院lu, 我好似幫佢做緊宣傳呀可".

由於佢對我個病程唔熟, 所以都攪左一輪資料, 又問我食緊乜野藥, 再望下電腦睇我最近d血報告, 跟住就加我藥, 唉! 我自己睇到報告話蛋白尿多左, 係要加d藥, 不過如果係之前個醫生, 佢就唔會一加就加咁多, 仲會顧住我食左會唔會頭暈(血壓藥令血壓太低). 呢個高級醫生既做法一直都比較aggresive, 我其實一直都知, 同埋佢唔鐘意個病人問太多問題, 又唔鐘意解釋俾你聽點解要加藥, 總之佢話做乜你就要做, 唔好問咁多, 所以唔係幾鐘意睇佢(老實講, 呢種方法對老人家都話OK姐, 喂, 我後生女梗係想知你點解咁做啦), 我已經同佢講明我會頭暈, 佢都唔係好理我, 唉!

我依家最想就係搵番o個個醫生, 如果佢自己開診所, 我一定幫襯, 始終俾佢睇左幾年, 有感情嘛! 佢真係一個好好o既醫生!