難捱的兩夜

回想起第二次換完骹住院，真的是苦不堪言。事發在轉到復康病房那天，全間病房連我在內有六個病人，只得我一人比較年輕，其他的全是婆婆。心想，今晚又是上演鼻寒大合奏之夜，已做定了心理準備。

後來發現我鄰床的阿婆是撞聾的，基本上可以說已九成聽唔到， 就算係佢耳邊講野，都要超大聲。阿婆脾氣差，又唔知佢因何入院，只係見佢成日自己上床落床，好似好靈活咁。但護士則吩咐我幫手睇住阿婆，話如果佢自己行出病房就㩒鐘仔通知佢地，咁即係阿婆係行得唔穩陣啦。一個下午，已令我怕左阿婆。

首先，佢有個會一個鐘就大大聲報一次時既鐘，“依家係下晝三點鐘， 依家係下晝四點鐘”如此類推，日頭都無所謂，但半夜瞓瞓下突然咁報時，咪唔使瞓囉！另外，佢有個響得好大聲既手提電話，電話響左好耐，佢都係聽唔到既。仲有就係，佢係床度想攞個床頭櫃既野，但個櫃門可能實左D，佢就好大力咁撞開張高椅，就係咁， 成日撞埋我張床，一個下午都已經撞左我好幾次，救命呀！我D肉仲痛緊架！到探病時間，佢個仔嚟探佢，佢就大大聲講野，又閙屋企人， 好惡頂！呢D都唔算最痛苦，最痛苦既係夜晚瞓覺既時候！ 

阿婆十點幾就瞓，起初都無乜野，到十二點就黎料，佢可能有D傷風感冒，因為打平瞓，所以就鼻水倒流，就係咁，佢坐起身開始“卡To",就係咁”卡To"左成晚，明明就卡唔出，都要夾硬卡，聽到我勁辛苦，跟住就輪到呻鼻，呻到劏豬咁聲，吐完痰就到鼻水，唉， 不但耳仔受罪，仲有心理上好大壓力，佢個鐘又響“依家係半夜三點鐘”。因為我自己長期病患，抵抗力比較差，對呢D傷風感冒特別驚，怕俾佢傳染到就唔好啦。忍無可忍下，終於要求護士調床，可惜因為係半夜，仲要無乜床位，所以調唔走，我唯有要求護士俾個口罩我都好。最後我成晚眼光光，耳戴住耳筒，口鼻戴上口罩，先勉強到天光。全場個個病人都無瞓。如事者，第二晚都大同小異，不過就只係嘈左四個鐘，叫做勉強有得瞓下。

雖然我知阿婆都好辛苦， 但又實在係勁難頂囉，大家都係病人， 點解我仲要受埋阿婆你既唔舒服呢？ 我住院既日子同經驗都唔少，試過瞓係個成晚叫救命既阿婆隔離都無今次咁辛苦囉！好彩頂左兩晚，個阿婆終於都出院，我先至有覺好瞓咋！

期待五月的來臨

做完了兩次換骹手術， 發現原來手術並不如我想像般可怕，可能因為我覺得並不太痛， 止痛機也只按了三數下， 連護士也常來問我為何不按掣呢！

雖然做完手術係有些動作不能做， 但也不如我想像般不方便， 起碼我可以再行街， 兩隻腳的長度變回一樣是令我最喜悅的， 因為從此我買鞋就方便許多， 唔使再為用加高鞋墊而煩惱了。

要是我一早知道手術是這樣的， 我一定會一早就做了， 不會等到今天（骨枯後差不多十年）才做。但話說回頭，如果我不是忍痛忍了這麼久， 對痛已經習已為常， 可能我會覺得今次手術是很痛的。所以痛的程度絕對不能作準，而且更是因人而異！

再過兩個星期，就會由腳尖走路轉為半力走路，然後再過六個星期， 正常的話，我大約五月頭就可脫離拐杖的行列。

很期待呢！

換骹手術（Total Hip Replacement)

我換骹手術後的過程：

手術後被推到復甦室，給我一個止痛機按扭，叫其中一位親人進來望清醒的我一眼，再出外等候。大腿間已用梯型架將雙腿分開。等待被推上病房， 家人便可探訪。右手吊着鹽水加止痛機， 腳上吊着一個玻璃樽，用來盛着傷口流出來的血水。晚一點要在左手再多打一個Grip, 因為要用來打止嘔針或抗生素。整整三天睡在床上，大小二便， 食飯飲水， 不能坐得太直， 要間中做腳指運動， 痛的時候就按止痛機和食止痛藥。要下床便要等痛症科姑娘下令可拔走止痛機和玻璃樽才可。拔走機後，會有物理治療師及職業治療師到來教做運動。很快就被轉到復康病房了。到了復康病房，一整天都是運動日，半天物理治療， 半天職業治療，而事實上，等待的時間居多， 實際上每款治療只得大約一個鐘。等待期間，還會有磁療和冰袋幫傷口散腫。一開始會用學行架學行， 慢慢就會轉到用拐杖， 熟習了就可以出院。職業治療師還會問你家的設備是否足夠， 他會提議你要買那些用品， 例如加高坐廁，坐椅，浴缸用的板等等。總之回到家裏一切都要適應， 因為會有頗多動作要注意的。

做完第二次換骹手術已有一個多月的日子了！回想兩次手術，真的有頗大差別呢。
首先是，

住院日數： 第一次手術，總共住了十四天，傷口拆了線才出院。第二次手術，共住了六天，要不是洗腎，五天已可出院了，出了院才回去拆線。

嘔吐情況： 第一次手術，嘔了三天，第二次手術，一次也沒有。

拔走嗎啡止痛機： 第一次手術，第三天才拔走。第二次手術， 第二天已拔走。

轉往復康病房： 第一次手術，第四天轉房。第二次手術，第三天轉房。

輸血： 第一次手術，需要。第二次手術， 不需要。

學行進度： 第一次手術， 極慢，因為要用左腳做好腳，但它卻是隻痛腳。第二次手術，神速，皆因右腳已是隻好腳，可以好好走路。

雖然表面上好似第二次手術好D， 但事實上各有各好。第一次手術做完後，雖然嘔得極辛苦， 但其實腳沒有太多的痛， 只係未有力，感覺非常舒暢。相反，第二次手術做完後，一出手術房，大腿肌肉已經在痛，按了兩次止痛機後才好一點，雖然沒有嘔，但痛卻比上一次多，不止大腿痛， 還有後腿痛， 到今天還間中在痛。

要總結的話，第一次的手術做得比第二次好。但麻酙的話， 絕對是第二次的比第一次的好。可惜的是， 第二次麻醉師打Grip的技術，真是不敢恭維。我兩隻小手的瘀傷， 到今天還未散呢！

新的一年

快要做第二次髖關節手術了！ 雖然第一次的手術尚算順利， 亦沒有預期中那麼痛， 但心裡還是有點緊張， 有點害怕。害怕的不止是痛， 而是怕嘔！皆因上次手術後嘔個不停， 還要平躺着嘔， 極度難受呢！

今個星期五，我的右腳終於放監了， 可以不用再拿拐杖行路。不經不覺已過了手術後的 6＋6 過程。6＋6 代表6個星期的腳尖走路（touch down) 和6個星期的半力行走(partial weight)。手術前， 因為關節枯了令我矮了一點， 手術後我的腳已變回以前的長度，但腳筋拉得很緊， 因為腳突然長了， 肌肉便拉得緊了， 到現在還要常常做拉筋運動呢！ 第二次手術後， 我的左腳相信會有同一命運， 要再受拉筋的苦， 慘！

很期待雙腳自由行走， 不用拐杖的日子， 但一切已跟十年前有太大的分別了。很久沒去過銅鑼灣， 相信所有舖頭都變了樣。我已變成大鄉里出城，很久沒搭過地鐵和巴士小巴，很久沒有單獨一人上街， 一切一切， 要重新適應，只怕有點不太習慣。

希望一切都安好， 這也算是我新一年的願望。也希望我的blog 友個個身體健康， 快快樂樂！

手術給提早了

剛過去的星期六下午，突然收到醫生電話， 說有病人取消了今個星期五的手術， 問我可否提早做。經過跟老公商量一番後，決定提早了。

原來安排了跟家人的燒烤， 去不了。訂了枱慶祝結婚週年， 也去不了。如果7天至十天內可出院， 那我還可以慶祝到生日。

26／10／12（星期五）， 還有兩天就到， 我已開始執拾日用品， 希望我能承受到那種痛， 希望能快快出院， 希望一切順利。

終於要做全關節置換手術了（Total Hip Replacement)

30／11／12（星期五）就是我變成機械人的日子。從此以後， 我已不再是完全的我，一切再變得不一樣。縱使得回行走的能力， 但亦有很多動作不能再做， 否則新的人工骹脫骹就麻煩了，又要開刀做手術。

雖然這次已不是我第一次做手術， 但我真的感到害怕，因為手術跟以往的大大不同，而且也屬於大手術，傷口亦大，在屁股至大腿開一條約13cm的傷口，已知要用嗎啡止痛， 還有之後的復康治療，一想起就已經覺得很心煩。

做完手術要住最小一個星期醫院，直至可以用步行架行路才可回家。首三個月要特別注意各種姿勢，睡覺又要加枕頭在兩腿之間，上廁所又要加高坐廁， 在浴缸沖涼我還未想到如可進入浴缸而又不用抬腿。總之所有動作會令盆骨與大腿之間的角度少於90度都不能做。

相信我將會極之不習慣，我最喜愛的側睡不能做，最喜愛屈腿坐在梳化上又不能做， 又不能陪小狗坐在地上， 不能想像將來的日子如何過。每次一想到這裏，就很自然地不想做手術， 但我現在連行一步路也覺困難，而且到那裏都要坐輪椅，極之不方便，所以手術已到了不能不做的地步。

如果有人已做了這手術， 可否分享一下是否真的這麼不便嗎？

又要搬家了

在這裹， 不知不覺原來已住了兩年半了。感覺真舒服， 完全沒有搬的意欲。要不是業主的一個電話， 相信我還會繼續住在這個舒適的家。已經有種不捨的感覺， 真的極不想離開， 最慘沒有足夠彈藥， 否則會恨恨的叫老公買下這單位， 那就無後顧之憂。

我已排了期做關節置換手術（Total Hip Replacement)， 現在還在等待8月的骨科覆診， 希望醫生可以提早我的手術日期， 因為我現在已痛得不能自己出入了， 去那裏也要用輪椅代步， 所以手術越快完成， 我便能越快行動自如。倘若手術期真的太遲， 我真的會考慮到私家醫院做手術。

無論如何， 依家最緊要執屋搵樓， 希望會有個合心意的單位啦！實在太小盤了， 唉！